كۆمەڵگای نێودەوڵەتی، سەركردەكانمان، میدیا و خەڵك سەرقاڵن بە سیاسەتی رۆژانەی عێراق. بەڵام شتێكی مەترسیدار لەئارادایە و خەریكە دەچەسپێت: كۆمەڵگایەك خەریكە دەچەسپێت كە تێگەیشتنێكی نییە بۆ جیاوازبوون، كۆمەڵگایەك تووندڕەوی دروست دەكات و رۆژ لە دوای رۆژیش (گۆشەگیرتر) دەبێت لەم قۆناغی تێكەڵاوبوونی جیهانییەدا.
رۆژ بەڕۆژیش هێماكانی ئەم دیاردەیە ئاشكراتر دەبن.
رۆژێك، هێرش دەكرێتە سەر كڵێسە، چەند رۆژێكیش دوای ئەو موسڵمانەكان جەژنی قوربانیان بەڕێوەبرد، هەروەكو ئەوەی هیچ رووینەدابێت.
چەند رۆژێك دواتر، ئەنجوومەنی پارێزگای بەغدا، بڕیاریدا مەی فرۆشتن لە پایتەخت قەدەغە بكات.
دوای ئەویش وەزارەتی پەروەردە بڕیاریدا وانەكانی شانۆ و مۆسیقا لە پەیمانگای هونەرە جوانەكان قەدەغە بكات.
هەفتەی رابردووش، ژمارەی وەزیرە ئافرەتەكان كەمكرانەوە بۆ سفر. ئەمەش دوای ئەوەی كە لەكابینەی ساڵی 2004 دا حەوت ئافرەتی تێدا بوو، ئێستاكە حكوومەتێكی بێ ئافرەت راگەیێندراوە.
ئەم هەفتەیە موسڵمانان، یادی عاشوورایان كردەوە و مەسیحییەكانیش كریسمسیان نەكرد "هەروەكو چاوەڕوان دەكرێت لێیان، دەبێت تێگەیشتنیان هەبێت بۆ برا موسڵمانەكانیان"!
لەگەڵ ئەوەی حكوومەت، میدیا و خەڵك دەڵێن كە یەكسانی هەیە، واقیعەكەی ئەمڕۆ ئەوەیە كە عێراقێی جیاواز هەیە. سوننەی عێراقی هەیە، شیعەی عێراقی هەیە، مەسیحی عێراقی هەیە، ئێزیدی عێراقی و چەند عێراقییەكی دیكەش.
ئەگەر ئەمڕۆ ئافرەت بیت یاخوود هونەرمەند، یان كەسێكی بەهرەمەند بیت، عەلمانی بیت یان لیبراڵ، مەسیحی بیت یان ئەندامی گرووپی ئایینی بچوكتر، رۆژ لە دوای رۆژ جێگات لە عێراق تەسكتر دەبێتەوە. وردە وردە عێراق زیاتر وڵاتی ئەوانیترە نەك هی تۆ و كارێكی كەمیش لەلایەن دەسەڵاتدارانەوە ئەنجامدراوە بۆ سەلماندنی پێچەوانەی ئەو قسەیە.
لەكاتێكدا لەهەندێ وڵات، مشتومڕی بەرز راگرتنی ئازادی و سەروەریی یاسا ون دەبێت لەپێناو بەرقەراربوونی ئاسایشدا، بەڵام لە عێراق ئەوە بەپێچەوانەوەیە. تەسككردنەوەی ئازادییەكان و پێشێلكردنی سەروەریی یاسا بەهەمان مەبەستی توندڕەوەكان روودەدەن كە ئەوان شەڕی لەپێناودا دەكەن نەك بەمەبەستی بەرقەراربوونی ئاسایش.
لەڕاستیدا ئەوە ئامانجی پێچەوانەیی لێ دەكەوێتەوە. سنوورداركردنی ئازادی و پێشێلكردنی سەروەریی یاسا، خەڵك زیاتر تووڕە دەكات و بەمەش هەستی خاوەندارێتییان بۆ وڵاتەكە كەمتر دەبێت، ئەمەش بێگومان دەبێتە هۆی زەرەرگەیاندن بە ئاسایشی وڵات.
لەهەر كۆمەڵگایەك یاخوود وڵاتێك، كاتێك كە بەرەو خراپی دەڕوات، ئەركی سەركردەكانی كۆمەڵگا و سیاسەت دەستپێدەكات تاوەكو شتەكان بەرەو رێگای راست بڕۆن.
لە عێراق، رووبەڕووبوونەوەكە جیاوازە، لەوەتەی هەیە، عێراق وڵاتێك نەبووە بەكەڵكی هەموو خەڵكەكەی بێت، ئێستاش ئەركی هەمووانە كە پێچەوانەكەی بهێننەدی. سەركردەكان، میدیا و خەڵك بەرپرسیارن لە بەدی هێنانی ئەوە.
بەڵام لەوەناچێت كە هیچیان توانای ئەوەیان هەبێت بۆ گەیشتن بەو ئاستە. لەو سێ لایەنەش، سەركردەكان بەرپرسیاری یەكەمن.
ئەگەر لەسەروەختی كریسمسدا، سەركردەیەك ئامادەی مەراسیمێكی كڵێسە بووایە (وەكو یاسر عەرەفات)، یاخوود سەركردەیەك لێدوانێكی توندی دژ بەوانە راگەیاندبایە كە دەیانەوێت عێراق بگەڕێننەوە بۆ سەردەمی تاریكی، یاخوود ئەگەر مالیكی بێ وەزیری ئافرەت نەیەتە نێو پەرلەمان، ئەوا میدیا باسی دەكات و خەڵكیش چاوی لێدەكات.
هەڵوێستی وەكو ئەمە عێراق لە دەوڵەتێكی ئاینی دیكتاتۆرییەوە دەكاتە وڵاتێك كە شیاو بێت بۆ هەمووان.
ليست هناك تعليقات:
إرسال تعليق